About me

                             السلآم عليكم و رحمة الله و بركآته

30/6/2015     بدآيه فتح المدونه

سببي لفتح هذي المدونه لأني ابغى اتوسع في هذا المجال ، حابه يكون في مدونتي ريفيوهات غير و مواضيع ، حبيت اكون مميزه في هذا المجال و اعرض لكم تجاربي المختلفه و مشترياتي

{ هويتي الشخصيه }

اسمي : مها الصالح ،، دلعي : موهيا او مهوي
من مواليد 1996 ،، من الرياض
جآمعيه : في جآمعه الاميره نوره / كليه إداره الاعمال ، تخصص : محآسبه

{ قصتي مع الميك اب }

في ايام المتوسط مآ كنت احب الميك اب كنت احب الجمال الطبيعي مع اني كنت احب الارواج بشكل مو طبيعي ، صح ان كان اغلبنا ما كان يحب الميك اب وهو في المتوسط لانه يعتبر صغير بس هالايام البنات الي في المتوسط صاروا يحبون الميك اب ..
بدايتي بالميك اب تقريبا من نهايه ثالث متوسط الى اولى ثانوي و كنت اهتم بالارواج اكثر شيء كنت احبها حب =)) اول ارواج من ماركات عندي  انجلوت و كراجا بعدها ماك ، ما كنت اعرف ايش هو الفونديشين بس كنت احسبه تان ، و كان اول فونديشين عندي من ماك و اول باودر كمان من ماك و كمان باودر برونز من بودي شوب ، و عرفت ان باودر بودي شوب مو بونز طلعت هايلايتر برونز ، و كان اول شدو لي من انجلوت ..

بعد اولى ثانوي يعني بدايه ثاني ثانوي بديت اشتري و بديت اهتم بالميك اب حتى وصلت لثالث ثانوي و انا مدمنه ميك اب ، و كنت اتعلم من الاجانب باليوتيوب كيف يحطون ميك اب و صرت مثلهم لما اجي اطلع اسوي الميك اب ، و بين فتره و فتره اتعلم شيء .. و كنت ما احط ماسكرا مع اني كنت احط اي شادو ! بعدين صرت احط و كمان ما كنت احط اسوي حواجبي :/! سويتها متأخر في ثالث ثانوي بديت اشقرها و ارسمها ! و الآي لاينر كنت اكرهه :/! كنت اقوله عنه انه يصغر عيوني ! بعدين صرت احبه ،، و سبحان الله من اشياء كنت اكرهها الى اشياء احبها و اموت فيهآ لدرجه ان مكافأتي تروح على الميك اب .

{  فكرة مدونتي }

حبيت تكون مدونتي فيهآ منتجات شوي غير عن الباقين حبيت مدونتي تكون مميزه من تجارب من مشتريات من مفضلات من الاهتمام بالبشره ، صح في بعضها نفس الباقين بس حابه اضيف اشياء غير و خاصة في التجارب و بشكل آكبر من الانستقرام و مآبي اسوي مواضيع سووها خبيرات التجميل مثل: [ الاندرتون ، الفونديشين ، الكونسيلر ، الباودر ، الخ...]، و ما اعتبر خبيره ميك اب بس انا انسانه مدمنه له و ان شاء الله في المستقبل اصير خبيره فيه اكثر من الحين ،، و في شيء جديد و حابه يصير في مدونتي و الي هي مدينه دبي حابه كذا اكتب عنها و عن السياحه فيها عن فنادقها و اسواقها و محلاتها و مطاعمها لأني من محبي مدينه دبي جدآ جدآ ف حآبه تصير شيء جديد و حلو في مدونتي .

و ان شاء الله المواضيع تعجبكم الي احطها تعجبكم .